ISUA HI JEHOVA A NI (Kumpuan Huang)

    Thuthlung Hluia Pathian pakhat chauh kha Isua Jehova hi a ni tih tilang fiah turin Pathian lehkhathu sawm leh pahnih kan han tarlang dawn a  ni.
   
    1.   Isaia 40:3 thu chuan Thlalera mi au rawl chuan, “LALPA (Jehova) lamlian sial ula” ati a, he hrilhlawkna thu hi Baptistu Johana khan a rawn tidik ta a ni tih Matthaia 3:3 thu hian a sawi a ni. Johana hian LALPA Isua Krista tan kawng chu a buatsaihsak tih kan hria. Hetah hianh LALPA (Jehova)  hi Isua sawi nan hian a hmang a ni. Jehova hi Pathian pakhat hming zahawm tak anih avangin Israelte Mi thianghlim tan chauh lo chuan mi dang sawi nan Bible hian a hmang ngailo.
    2.   Malakia 3:1 thu chuan, “In zawn LALPA (Jehova) chu a Biak Inah alo kal phut ang; Ngaiteh u, Thuthlung Tirhkoh in lawm em em chu alo kal e” tiin a sawi a. Kuta sak Biak In emaw  taksa Biak In emaw a sawi anih pawhin he thu hi Isuan a rawn tifamkim ta hrim hrim a ni.
   
    3.   Jeremia 23:5-6 thu hian Davida atanga zar alo chhuah tur a sawi a-hei hi Messia (Isua) sawina a ni ngei mai a – A hming chu “LALPA chu kan felna (Jehova Tsidkenu)” tih a ni. Kawng dang kan sawi chuan “LALPA (JEHOVA) CHU KAN FELNA” tih hi “Isua chu kan felna” tihna  a ni.
   
    4.   Isaia’n Jehova chanchin sawiin, “Ama ban ngei chuan Chhandamna chu  a insiam a” (Isaia 59:16); “A ban chuan a aiah ro a rel ang” tiin (Isaia 40:10). Isaia 53:1-2 thu chuan Messia (Isua) ngei hi LALPA (Jehova) ban lo lang chu a ni tih a sawi a. Tichuan Isua hi Pathian dang nilovin Khawvel chhandamna tura Jehova mihring tisa taksa chu  a ni.
   
    5.   Isaia chuan, “LALPA (Jehova) ropuina chu tihlan a ni ang a, mi zawng zawngin chu chu an hmu tlang dial ang” ati a (Isaia 40:4). Jehova chuan ropuina chu tu hnenah mah a pek loh tur thu a sawi bawk a (Isaia 42:8; 48:11). Chuti anih chuan he hrilhlawkna hi amah ngei ain tihlan chauhvin a thleng dik thei tihna a ni. Pa ropuina chu Isuan a nei tih Thuthlung Tharah kan hria a (Johana 1:14; 17:5). Ropuina Lalpa a ni (I Korinth 2:8). Isua chu alo kal leh hunah pawh Pa ropuinaa inthuamin alo kal dawn a ni (Matthaia 16:27; Marka 8:38). Tichuan Jehova ropuina chu Isua ropuina a ni a, chuvangin Isua hi Jehova chu a ni.
   
    6.   Jehovan heti hian a sawi a, “Chuvangin ka mite chuan ka hming an la hria ang; chuvangin chumi niah chuan a sawitu chu ka ni tih an hri ang; ngaiteh u, Keimah hi ka ni” tiin (Isaia 52:6). Isua hi Pa chanchin sawitu a ni a, Pa hming tilangtu a ni a, Pa hming hriattirtu a ni bawk a (Johana 1:8; 17:6; 17:26). Isuan LALPA (Jehova) hming chu a tilang a (Sam 22:22; Hebrai 2:12). Chutichuan Isua hi Jehova ngei a ni.
   
    7.   LALPA (Jehova) chuan, “Khup tinreng chu ka hmaah an thingthi tawh ang a, Lei tinreng pawhin ka hnenah chhechhamin thu an tiam tawh ang” ati a(Isaia 45:23). Hemi thu hi la chhuakin Paula’n mi zawng zawng Krista rorelna hmaa ding tur an nih thu a sawi a (Rom 14:10-11). Paula vekin, “Mitin Isua hmaah an thingthi dawn a ni” ati bawk a(Philippi 2:10).
   
    8.   Zakaria hian Isua Krista chu Jehova a ni tih finfiahna tha tak mai a sawi a. Zakaria 11:12-13 thuah chuan heti hian kan hmu a, “Tin, an hnenah chuan, tha in tih chuan ka hlawh chu min pe ula, intih loh chuan minm pe suh u, ka ti a; chutichuan ka hlawh atan cheng sawmthum an buk chhuak ta a. Tin, LALPA (Jehova) chuan ka hnenah, ka man atana tha awm tawk an chhiar chu bel vawtu hnenah pe mai rawh, ati a. Tin, cheng sawmthum chu ka la a, LALPA (Jehova) inah chuan, belvawtu hnenah chuan ka pe ta mai a ni” tiin. Zakaria 12:10 thuah chuan Jehova’n heti hian a sawi bawk a, “Tin, an chhuna chu min la rawn en ang” tiin. Isua hi cheng sawmthumna an hralha chu a ni a, an chhuna chu a ni bawk a (Matthaia 26:14-16; Johana 19:34).
              
    Zakaria 12:10 thuah chuan, “Davida chhungte chu Pathian ang an lo ni ang a” tih kan hmu bawk a, hei hi Messiah tlawhchhanin a sawi a ni. Zakaria 14:3-5 thuah chuan, “Tin, LALPA (Jehova) ka Pathian chu alo kal anga, A mi thianghlim zawng zawngte pawh I rualin an lo kal ang” tiin hnamte a do tur thu Olive tlanga a ke a rawn nghah tur thu kan hmu a, Isua hi a rawn kal leh hunah chuan Olive tlangah a ke a rawn nghat dawn a ni tih kan hria a, Lalte Lal ang leh hotute Hotu angin hnamte chu a rawn do bawk dawn a ni (Tirhkohte 1:9-12; I Timothea 6:14-16; Thupuan 19:11-16).
   
    9.   Paula, Juda lehkhathiam, Pharisai chungchuang, Kristiante tiduhdahtu kha Damaska khaw kalkawngah mitdel khawpa engin Pathianin a chhun thlu a, “Lalpa tunge I nih ?” tiin a zawt a. Juda a nih avangin Lalpa Pathian pakhat chauh a awm tih a hresa vek a, “Jehovah tunge I nih ?” tiin a au chhuak ta a, Lalpa (Jehova) chuan, “..Isua ka ni”” tiin a rawn chhang a nih kha.
   
    10. Mosia khan Pathian Jehova chu a be thin ngei tak a, Hebrai 11:26 thu chuan Aigupta ram hauhsakna ro zawng zawng aiin Krista an hmuhsitna chu Mosia chuan hausakna ropui zawkah a ngai a ni tih thu  a sawi , Mosia Pathian chu Isua Krista hi alo ni daih tawh tihna a ni.
   
    11.  Sam 68:18 thu chuan Jehova chu chunglama a chhoh thu leh a mante chu sala a hruai thu a sawi a, chutih lai chuan chunglama han chhova, a mante chu sala hruaitu chu Isua a ni tih kan hria. Eph 4:7-10 thu hian Isua chanchin hrilhlawkna a ni tih a tilang a ni.

==========================

VOL.I, ISSUE NO. 23 ; 25th OCTOBER, 2015 ; BAIRABI NORTH PYD ; PATHIANNI,

HEAD QUARTERS LOCAL PYD-IN SOUTH LOCAL PYD KAN DAWN

Local PYD Office Bearers Meeting in alo passed tawh angin Dt. 26/10/2015 (Thawhtan) Zan hian Bairabi Head Quarters Local PYD-te chuan Bairabi South Local an kan dawn a. He inkanna in a tum ber chu Thlarauvah chak lehzualna kan neih theihna turin leh inpawhna tha kan neih theihna turin a ni. North Local PYD member zawng zawngte Naktuk Zan inkan hunah hian a tam thei ang ber kal i tum theuh ang u. Bro. Lalbiakdika Pachuau-in tanna hun a hmang ang a. Bro. Lalrokima’n thusawina hun a hmang bawk ang.

FUNDAMENTAL DOCTRINE BANNER LEI THEIH DAWN

Bairabi Bial chhunga Local hrang hrangah Bairabi South Local PYD chuan Fundamental Doctrine Banner zawrh theihin a siam dawn a. Local hrang hrangten tlawmngaia minlo leisak turin Lalpa Isua hmingin kan ngen a che u. Amah Rs. 60 a ni ang.

LAWMTHU SAWINA

Bairabi North Local PYD chuan YMA General Conference chhung khan Ice Cream, Cold Drinks te a zuar a. Zuartute zawng zawng chungah hruaitute chuan lawmthu an sawi a ni. Ice Cream zawrh tur hi Bro. Richard Lalrinchhana leh Bro. R. Lalremruata-te chuan a lakna tur an buaipui a. Tin, Bro. Varhlunkima chu sum vawngtu niin PYD member thenkhatte leh Senior Department lam atang tein thahnemngai takin Ice Cream an zuar a. An chungah Local PYD chuan lawmthu a sawi tak meuh meuh a ni.
    Bro. R. Lalremruata’n a motor a thawh a. Tin, Pu R. Laldawnglianaten an Deep Freezer hmantirin Kohhran chhungkuaten an Fridge min hawhtir bawk a. Lalpa Isua hmingin lawmthu kan sawi a ni. Tin, Security lamin hmun min hman tir avangin a biktakin Bro. F. Lalhriattira chungah PYD chuan lawmthu a sawi a ni.
--------------------------------------

BIALTU PASTOR PROGRAMME

Bialtu Pastor P. Vanlalfela chu Mamit-a District Missions Department Conference ah a kal. Conference zawh hian alo kir leh ang. Kan tawngtainaah i hre reng ang u
--------------------------------------

DAMLO

* Sis. Canaan Ramchullovi, inherhpui
* Bro. Lalrintluanga (SouthLocal) Malaria natna veiin Damdawiinah Dt. 19 khan admit a ni a. Dt. 28 (Nilaini) khan Damdawiin atangin a chhuak leh a ni. Kan tawngtainaah i hre reng ang u.

=================================================

EDITORIAL : KOHHRAN LEH KHAWTLANG TAN

 Kan hmuh leh kan hriat theuh angin Mizorama inkhawmpui lian ber YMA General Conference Vawi 70-na chu naktip mai khian kan lo thleng dawn ta reng mai a. Chhungkua tam zawkte chuan he khawmpui lian lo thleng tur hi kan huphurh tlang hlein a rinawm. Amaherawhchu, he kan huphurhna tak hi kan thlen zawhna lai tur chu a ni tlat thung!

    Kan huphurh em avangin theihtawp chhuahin hnatlang, tangrual pawl tihtein chhumlo chatlovin hma kan han la tan chho mawp mawp a, kar khat lek hnuah pawh hmasawnna tamtak; faina kawngah, in leh lo, Biak In leh a vel chei thatna kawngahte hma kan sawn ta hle mai. Bawlhhlawm Bawmte kawng dunga dahin a bawma paihna changte kan lo hre chho tan ta.  Hmasawnna chi khat chu a ni e.

    Kan huphurh em em thin chu nghakhlel takin kan lo thlir thei ta! Mizoram pum huap khawmpui lian anih miau avangin Conference hun chhung zawnga kan chezia chuan kan khaw hming a chher dawn a. Kan awmdan leh chezia a lo mawi lo anih chuan, ‘Bairabi chu . . .” tih anih zel tawh dawn avangin mitinte nundan tha leh hawihhawm, Sunday School-ah leh Sermon-ahte kan ngaihthlak fo thin ang kha kan hman tangkai angai dawn hle a ni.
    

   Khawtlang hi kan awmna anih miau avangin a hmalakna reng reng kan hlamchhiah thiang lova, theihtawp chhuahin Kohhran leh Khawtlang tan kan inpe tur a ni. Amaherawhchu engpawh ti ila, Lalpa hre reng chungin kan ti tur a ni. Lal Isua hre reng chungin YMA Gen. Conference hman nuam vek ule 

=========================

VOL.I, ISSUE NO. 22 ; BAIRABI NORTH PYD ; PATHIANNI, 18th OCTOBER, 2015

LOCAL PYD O.B MEETING RORELTE

    Dt. 11/10/’15 (Pathianni) chawhma inkhawm ban hmang khan Local PYD Office Bearer Meeting neih a ni a. Chuata an rorelte chu:
1. Local PYD Committee in alo passed tawh Kohhran chhungtin tan Name Plate siam nise tih O.B kuta alo dah chu ngaihtuah ho a ni a. Name Plate hi tunkar chhung ngeia siam nise, pakhat zelah Rs.60 a hralh nise ti-a passed a ni.
2. Local PYD Committee-in memberte intihsawt twn nana Local dang kanna neih nise tih chu bawhzuina neih a ni a. Dt. 26/10/’15 (Thawhtan) Zanah Bairabi South Local kan nise ti a rel a ni. Hun hmangtu turte:
Hun khat-na : Bro. Lalbiakdika
Hun hnihna : Bro. Lalrokima
    Local PYD Male Voice te hemi hunah hian an zai bawk ang.
3. Dt. 1/11/’15 (Sunday) Zan hian Male Voice te chu Bairabi North Local ah zaia rawngbawlna neih nise ti-a pawmtlan a ni.
4. Local PYD T-Shirt siam nise tih Local PYD Committee in alo rel tawh chu bawhzuina neih a ni a. Bro. Lalrinliana Tlau kutah dah a ni.
---------------------------------------------------------------------

LOCAL PYD FELLOWSHIP HLAWHTLING

Local PYD chuan Dt. 10/11/’15 (Pathianni) Tlai Dar 2:40 PM atanga tanin Bro. Vailuta, NHPC veng-te inah Fellowship Programme hlawtling tak an hmang.
    He hun hi Bro. Jacky Lalruatmawia’n kaihruaiin Pathian Thu tawi sawina hunte a nei a. Bro. R. Lalremruata (Maruata) chuan tanna hun a hmang bawk a ni. Tin, Bro. Vailutate nupa tan hian thawhlawm lakkhawm a ni a. Member 24 kalkhawmin Pawisa fai Rs. 1020 mai bakah khawrhchawte ken a ni bawk. Heng thilpekte hi Bro. PC Lalramchhuanmawia’n Bro. Vailuta hnenah hlanna a nei a ni. Bro. Vailuta-te nupa hi an lawm hle a. Lalpa fakin Halleluiah! tiin an au chhuak hial a ni.
    Bro. Vailuta hi tunah hian kum 80 a ni a. A nupui Sis. Lianzovi hian kum 75na a hmang mek a ni. An inah hian nupa chiahin an cheng a. Sis. Lianzovi hi a damlohna avangin khua hmu tha thei lovin kum 2 chhung ngawt alo mu tawh a ni. Keini Local PYD-ten inkhawmna kan va nei chu an lawm hle mai a. Kalkhawmte pawhin hetiang hun kan hmang thei hi a hlawkthlak kan tiin vannei kan inti hle. Bro. Vailuta-te nupa hian Kohhran mite an ngaihzia thu an sawi a, Biak Ina kal an chakziate leh kal tura chakna an neih tawhlohziate kalkhawmte min hrilh bawk a ni. 

========================

LOCAL PYD HNATLANG NEIH A NI

Dt.17/10/’15 (Inrinni) hmang khan Local PYD-te chuan Biak In leh a vel tihfai hnatlang an nei. Hnatlanga thawkchhuak zawng zawngte chungah hruaitute chuan lawmthu an sawi a ni.

FELLOWSHIP AWM DAWN LO: BUDGET KHAWN DAWN

Local PYD-te thla a thar angin Budget khawn alo hun leh ta reng mai a. Vawiin tlai fellowship awm lovin Budget khawn tur a ni a. Dar 2:40 aia tlai lovah Bro. J. Lalchhuanawmate inah innghahkhawm tur a ni e.

----------------------------

PYD BAWM

Kumtawp Activities leh tul dangte atan tiin Local PYD chuan Biak In-ah PYD BAWM a dah ve ta e. A tlem lua awmlo, tam lua awmlo, phal ang zat zat min lo thlaksak ve turin kan sawm a che .. 

===================

RINGTU CHUAN . . .

Lal Isua hnugzuitu anih tlat avangin a Lalpa awmdan ang chuan a hun a hmang chho thin a. Lal Isuan mi a rel chhe ngai lo tih a hriatin a thil lo tih thinte chu Lalpa duhzawng anih lohzia hriain a sim hmak a.
    

Kan tun hunah Lalpa Isua a takin hmuh theihin a awm tawh loh avangin a Taksa (Kohhran) a ngaina em em a. A maicham kal a thulh ngai lo.
    

Ani chu a chapo ngai lova, Kohhran huang chhungah duhsak bik leh fak bik pawh nei lovin mi huat zawng a sawi chhuak ngai hek lo. A that tehluh nen a thatna a sawi chhuak duh ngai lova. A inngaih hlu ngai hek lo. A inchhuang ngai lova, mi mawl ber thlengin kawm a nuam em em a. Tumah a en hrang ngai lo.
    

Thahnem a ngai em em a. Kohhran tan anih tawh phawt chuan tel zel a tum thin. Hnatlang a kalte, Fellowship, tawngtai-te leh Kohhran programme reng reng chu a telna tur a ni tih hriain thahnem ngai takin a tel zel thin.
    

A hun a ngai pawimawh em em a. Hun a vawng dik hle bawk. Kohhran hunruatah a hun alo thlen tawh chuan a hmang ngei ngei thin.
    

Ringtu chu a tawngtai taima em em a. Mi huat a nei lova, ama hawtute leh amah diriamtute tan a tawngtaisak zawk fo thin. Lalpa tan nitin a inhlan thianghlim thin a ni.
    

A khawvel hun hmanah pawh mi taima leh thawh hreh neilo, mi inngaitlawm em em mai a ni a. Khawvel mite angin a uang ngai bawk hek lo.Sum tlinglo a la duh ngai lova. A hausak phahna tur pawh nise a hnar zel thin. Kohhran ina len a taima hle. Ringtu chu i ni em le?

==================================

FELLOWSHIP HI . . .

Bairabi Head Quarters Kohhran tan chuan thil thar anih hial ka ring. Ka lo hriat ve chinah pawh Fellowship hi kan neih awm ka la hre ngai lova. Vawiin ni a PYD te hi kan chak bik vang pawh nilovin Lalpa Malsawmna kan dawn vang ni berin ka hria.
    

Kohhranah chuan a inpe thuk apiangin a chhunga chen nuam an ti a, ti ve mai mai tan erawh chuan ninawm lamah a kal hlauh thung. Chutiang zelin, Fellowship pawh a inhmang thuk tan chuan thil nuam leh chakawm tak a ni a, Pathianni vawi khat lek awl pawha lungleng hman em em an awm laiin, thla khata vawi hnih khat kal chauhte, chutah pawh ning hma em em lah kan bang hek lo!
     

Mi puitling a inchher duh tan chuan Kohhran hi bel tlak a ni a. A chhungah pawh lawi luh tam a ngai hle. Chutiang chu khawvel lam atang pawha ngaihtuah theih anih laiin Thlarau lamah ngat phei chuan kan Catuan Ro kan khawl khawm nan a pawimawh em em mai chu Kohhran hi alo ni leh zel bawk a. Chu Kohhran a rawngbawltu puitling leh Lalpa mi hman ni tur chuan PYD atanga kan tan chhoh hi angai a. Fellowship ah hian thupui sawihona-te kan nei thin a. Mahni vei zawngte leh Kohhran tana tha nia kan hriatte kan in share tlang thin a. Hei ringawt pawh hi puitlinna kawnga thil tha tak a ni.
    

Thlarau lamah pawh Fellowship hi a tangkai lehzual. Hlapui rem changte kan nei leh zeuh thin. Lalpan min awmpui thin hle a. Fellowship ah hian tawngtai thupuite thawhin tawngtai rualna kan hmang ho thin a. Lalpa awmpuina dilin, kohhran tan kan dil fo thin. Thlarau lama hmasawn duh tan leh mi puitling nih duh tan, Lalpa mamawh tan chuan Fellowship hi hmaih chi alo ni hauh lo !!

11th OCTOBER, 2015 : VOL.I, ISSUE NO. 21 ; BAIRABI NORTH PYD ; PATHIANNI,

BIAL MUSIC SUB COMMITTEE ROREL TLANGPUI

Ø Hla zir hun siam niin Thawhleh zan leh Zirtawpni zan ruat a n.
ØDan ennawnna neih a ni. A hnuai ami ang hian;
hmeichhiate chuan hlazirnaah pawnfen khup khuh an feng tur a ni a, kawr dar bah hak phal a ni lo, hlazir apiangin lukhum ken tur  a ni. Mipa-in kekawr bul a ha tur a ni lova, kawr ban bul (tawnzau) a ha tur a ni lo. tihte hi an ni.
   

BIAL MISSIONS DEPARTMENT CONFERENCE VAWI 34-NA ROREL TLANGPUI

Ø  Kum 2016 Conference chu Bairabi Head Quarters ah nghah a ni. A hun atan Dt. 30th-2nd Oct., 2016 ruat a ni.
Ø  Conference thupui neih a ni ang a, thupui erawh Bial Board kutah dah a ni. Speaker neih nise ti a rel niin, Speaker atan hian Bialtu Pastor P. Vanlalfela ruat nghal a ni.
Ø  Home Missions Field tlawh chungchang rel a ni a. Kolalian field tlawh nise tih chu lungrual taka pawmtlan a ni.
Ø  Budget khumte lawmman pek tawh nise tih a ni.
Ø  Conference thlengtute chu Rs. 1000 a tanpui thin nise tih a ni.
Ø  Local tinten Faith Promise neih theuh nise.
Ø  Resolution Committee chungchang rel a ni a. Tun atang chuan Resolution Committee chu Conference hma thlakhat hmalamah neih thin nise. Resolution Committee member ah hian Local tin Director-te ruat an ni ang a, Director a theih loh chuan OB dang Secretary emaw Treasurer ten ai an awh thei ang.
Ø  Official Badge chungchang rel a ni a. Tun atang chuan Bial hruaitute leh Local OB te badge siam tawh nise ti a passed a ni.

CHAWNGHEI TAWNGTAI NEI DAWN

Vawiin Dt. 11/10/2015 (Pathianni) tlai dar 5:00 pm hian Local LAD bul tumin Chawnghei Tawngtaina neih a ni dawn a. He hunah hian Kohhran member zawng zawngte min sawm a ni. Chawnghei theilo tan pawh inthlahrung lovin tawngtainaah hian kal turin min sawm a ni.

Ø District Missions Department-in Local LAD-te Dampa, Zodin Electric connection lakna tur Rs. 2000 an rawn dil chu. An dilna anga pek a ni.

PYD BAWM

Dt.12th Oct, naktuk PYD Inkhawm zan atang hian PYD inkhawm bikah Bawm dah a ni tawh ang. PYD member inkhawm turte thawhlawm bakah a thei apiangte tan Bawm-a thlak tur inring bawk ila a tha ange.

LOCAL PYD HRIATTIRNA

VAWIIN TLAIAH FELLOWSHIP

Dt. 11/10 (Pathianni) tlai dar 3:40 a \an thei turin Local PYD chuan Bro. Vailuta-te inah Pathian faka zaihona (Fellowship) hun hman a ni dawn a. He hunah hian Local PYD member zawng zawngte kal theuh turin kan inngen a ni. Tin, Fellowship ah hian Bro. Vailuta-te tan tanpuina/thawhlawm thawh tur a ni a. A thei apiangin thawhlawm ken theuh tur a ni.

========================================

LALPA CHU FAKIN I CHAWIMAWI ANG U by Jacky Lalruatmawia (Editor)

Pathian Ropuizia leh Chawimawi tlak a nihzia hmuchiang apiangin Pathian chu thlarau leh tihtakzetin chibai an buk thin a. An ti ve mai mai ngai lo! Kan hmuh phak piahlamte thlengin Lalpa siam loh engmah a awmlova, he khawvela thilnung chi tinreng leh van thereng hmuna Planet chi hrang hrang, Ni thla leh Arsi-te nen lam khian Pathian siam loh engmah a awm lo a ni. Sam ziaktu chuan ‘mihring hi eng nge maw a nih a i hriat reng thin ni’?’ alo ti hial a. Pathian ropuizia ngaihtuah chuan mihring chu ama lakah chuan engmah kan nihlohzia a hriat chian theih awm e. Ama anpui ngeiin keini mihringte hi min siam a, chu a chhapah kan thih hlen lohna turin a ramah chan minla siamsak leh ta zel a. Mihring engmahnilo tan chuan lunghlu a va ni tehlul em! Hla siamtu chuan Tuifianriat tui zawng zawng hi a ziakna tuiah hmang ila, van pharh zau takahte khian Pathian ropuizia ziak chhuak vek dawn pawh ni ila, kan la ziak seng chuang lovang alo ti a. Chuti fakauva ropui, siamtu Pathian chu engah nge kan fak mawlh mawlh  mai loh ang?
    

Sual lalna ram khawvelah kan la cheng tlat si a. Pathian ropuizia leh chawimawi tlak anihzia hre reng chung hian kan la vahbosan thin a. Kan la fak tha peihlo fo thin a ni. Lal Isua chuan ‘Tupawh mahni kros pu-a mi zui lo chu ka zirtir a ni thei lovang’ (Luka 14:27)-ah alo ti a. Kros chuan hrehawmna, diriamna, lungngaihna leh manganna a entir a ni. Harsatna kan chunga lo thleng thinte hi kan tan chuan Kros a ni tihna alo nih chu. Ka Lalpa Kros phurh nen khaikhin chuan a va zang tehlul em! Engah nge kan Kros phurhte hi kan tlukpui a kan kalpui theihloh leh mai thin le aw...? ka lo ti ve mai mai thin. Thlemna/hrehawmna hi Lalpa ringtu tak takte tan chuan kan tawn ngei ngei tur a ni a. Zion Lal tana beitute tan chuan harsatna tawklo rawngbawltu a awm theih hi ka ring lo a ni.
   
 Harsatna kan tawh changing Lalpa Kohhran tana kan rawngbawlnate kan chawlhsan mai dawn em ni ang? Ni love, Chutianga kan tih mai chuan Lal Isua zirtir kan ni thei dawn lo a ni. Chuvang chuan keini Lalpa Ringtute tan chuan harsatna kan tawhte hi min ti chheltu-ah kan hmang thiam thin tur a ni. Chutiang ti thei tur chuan mihring mihrinna chuan thil har tak pawh a ni ang. Amaherawhchu Pathian puihna erawh chuan thil awlsam tak a ni hlauh thung. A pawimawh berah chuan Tawngtaina hi a ni a. Harsatna, buaina leh manganna kan tawh chang hian Lapa hnenah inbunruak thin ila, a ni chuan min lo chhawk zangkhai thin ang tih hi ka ring tlat a ni. Tanpui vartu hnai reng anih miau avangin Lalpa hnena tanpuina kan dilte hi Lalpa lawmzawng a ni ngei ang tih ring tlat ila, Kohhran hlat phah nana hmang mai lovin Lalpa hnenah i intulut thin ang u. Tirhkoh Paula ngei pawhin Korinth khua a mite hnenah heti hian alo thawn kha “Chuvangin ka unau duhtakte u, nghet takin, tihchet rual lohvin Lalpa hna thahnemngai taka thawk fovin awm rawh u, in thawhrimna chu Lalpaah chuan a thlawn ngailo tih inhre si a” tiin. (I Korinth 15:58)
   

“Kei hi Grep hrui chu ka ni, nangni a pengte chu inni” (Johana 15:5) Lalpan alo ti a. A peng rah lo apiang chu a paih anga hal anih tur thu a sawi hial bawk. Lalpa hnungzuitu nih hi a va namai lo em! A mai mai lo a ni. A hminga zui ve mai chu Lalpa duhzawng a ni hauh lo mai. Kohhran hi Krista taksa a ni a. Keini hi a pengte chu kan ni tiin han kailek ta ila, a dik thei tho mai. Kohhran tana kan chanvo emaw Maicham kan thleng tam lo anih chuan Lalpan min ensan hun ala thleng maiang tih pawh a hlauhawm hle. Tin, Maicham kan lo luhin Kan Pathianin Thlarau leh tihtakzetin, theihna zawng zawng, thinlung zawng zawnga chibai buk turin a mite hi min beisei a ni tih hi hre reng ila. Iti mai mai lovang u. Lalpa duhdan hian awm i tum hram hram thin ila, Kan biak Pathian chu kan ti lawm ngei ang. Davida chuan Lalpa Biak In hung chhung kawtlaite chu a ngaih thin a vangin alo \ah phah hial a. A va ropui tehlul em! Keini Lalpa hnungzuitu inti tamtakte chuan Davida anglo takin Lalpa Biak In hung chhung aiin mahni in lum kan ngaih avang hian kan chauh phah mek tawh niin a lang!
        

Lalpa chu fakin ka chawimawi ang min tlantu anih vangin... tih hla sa a, lam mup mup tur kan nih lai hian nunna min petu, malsawmna min petu chu fak hleithei lovin leh Lalpa tan zan hun tak ngial pawh kan siamsak thei thin silo zawng a nih hi. Lalpan eng angin ngai ang maw! A ropuina zawng zawng kalsana kan tan hreawmna nasa tak a tawrh avang ringawt  pawh hian a maichamah kalin Lalpa chu fak tur kan ni asin. Hawh teh u.., Lalpa ram kan thlen hma loh zawng chhel takin awm ila, i din thar leh ang u, kan tan malsawmna zel a ni si a!
Lalpan Malsawm rawh se

“Lawm thu sawi chungin a kawngkharah chuan lut ula, Fak chungin a Biak In hung chhung kawtlaiah chuan lut rawh u: A hnenah lawmthu sawi ula, a hming chu fak rawh u” - (Sam 100:4)

EDITORIAL

A HO MAI MAI !

    Thil engkim hian chhan a nei vek a. Chhan nei lovin engmah hi alo awm ringawt lo a ni. Mi thenkhat hmangaihna la na deuhte chuan nang hi ka dam chhan i ni an ti fo thin a. An hriat chian loh vang mai mai a ni.
    

Vawin ni a nung dama kan awm chhan chu Pathian khawngaihna kan chan vang mai a ni a. Kan mihringpuite vang a ni hauh lo. Lal Isuan nunna minla pek lai hian thil tha tih nachang hre ta ila, kan thih hnuah vanah ro kan khawl khawm dawn a lo ni.
    

Bial chhung mai nilo, mahni lawina Local chhungah ringawt pawh hian Kohhran activities a tam thin em em a. Kohhran ti kaltu chu nang leh kei kan ni si... Department tin hian tihtur kan nei ngah em em vek mai a ni. Heng activities-te hi a Ho mai mai ti a kan lo namnul fo mai chuan Lalpan ro a rel hunah he nu/pa hi chu a ho e mai, tiin hremhmun lamah min tir liam maiang tih a hlauhawm mai loh maw!
    

Engmah hi Ho mai mai a awm lova. Kohhran a ni emaw, khawtlang a ni emaw engah pawh nise kan tih peihloh vang leh kan thatchhiat vang
mai hian thil hi ho mai mai ah kan ngai thin. Mi taima tan erawh chuan thil ho mai mai a awm lo a ni.
    

YMA khawmpui lian kan khuain kan thleng dawn a. Mipuite thuawihna nun kan neih angai khawp mai. Hruaituten Faina kawngah nasa takin hma an la a. Keini khawtlang mipuite hian a ho mai mai ti a kan thil ei-na kawr bawlhhlawh bawmah paihna chang kan la hriat loh fo zawngin kan mualpho hloh dah ange. Chutiang zelin kawng hrang hrangah hian tanrual kan mamawh a,
    

Thil hi A HO MAI MAI kan tih chhung chuan khawtlang/Kohhran chak kan ni thei ngai lovang.

================================

VOL.I, ISSUE NO. 20 ; BAIRABI NORTH PYD ; PATHIANNI, 4th OCTOBER, 2015

BIAL MISSIONS DEPARTMENT CONFERENCE

HMAN MEK  A NI

    Bairabi Bial Missions Department Conference chu Dt.02/10/2015, Zirtawpni Zan atang khan Saikhawthlir Local Biak Inah hman tan niin, Local hrang hrangte’n Report pekna an nei. Dt. 03/10 (inrinni) chhunah Conference Rorel Inkhawm neiin, Zanah Sis. F. Lalhlimpuii, Bethel Local Missions Director hnen atangin Pathian Thuchah ngaihthlakna hun hman a ni a. Vawiin nileng hian inkhawmpui Programme hi hman chhunzawm a ni ang a. Zaninah a tiak ang. Bial Missions Department Conference 2015 hman lai mek chu Pathian Thlarau awmpuina hnuaiah tluang tak leh hlim leh lawm taka an hman ngei theihna turin Kohhran hoten i tawngtaipui ang u.
 

Vawiin Conference hun hman dan tur tlangpuite:
Zing
Sermon : Pastor P. Vanlalfela
Thawhlawm : Bial pual
Chhun
Sermon : Bro. H. Vanlalrova
Secretary, Bairabi North Local Missions Deptt.
Thawhlawm : Basar Biak In sakna pual
Zan
Sermon : Evan. Laldingliana
Director Bial Missions Deptt.
Thawhlawm : Bial pual