Hman ata tawh kan awh em em, awt mah ila kan tih theih siloh Local Chanchinbu kan lo nei ve ta reng mai a. Chanchinbu chhuah theihna atana thiamnate Pathian tana hlana thahnemngaitaka hmalatute zawng zawng chungah kan Pathian neihchhun Lal Isua hmingin lawmthu ka sawi tak meuh a ni. Kum tamtak kaltaah khan committee in vawi tam Local leh Bial huapa Chanchinbu neih ve tawh nise tiin kan ngaihtuah tawh a. A hunlaiin tunlai angin hmanruate ala tha tawk lo bawk nen kan puitlin theilo thin a. Hetia Chanchinbu Local in kan han tichhuak ve ta mai hi mumang ramte pawh a ang rum rum in ka hre thin. Amaherawhchu Chanchinbu hian kaihhnawih thil a ngah em em a. Mi pahnih khat lek tan maia tih chi anih loh avangin Local mipuite thahnemngai taka tha leh tui thiamna leh kan remhriatnate kan finnate thawh zel turin Lalpa Isua hmingin ka ngen leh duh bawk che u a ni.
Editorial Board memberte mithar mai kan nih hlawm avang leh heti lama sulhnu nei kan awm vak loh avangin kan ar khaw thim dai naah hian tihdiklohna, insawisel mai lovin thahnemngai taka in finna min chhuahsak zel turin ka ngen leh duh bawk che u a ni. Article te ziaka kan thuthlung ropuitak hi miten an hmuh theihnan thahnemngai taka thu rawn thawh zel turin ka ngen leh che u a ni. Mi kan thuhmun lova, kan talent a inang lova, Biak In a thusawia harsatna neite, ziak lama rawngbawl mite a awm theih a chung mite tan chuan rawngbawlna zau tak a inhawng mek a ni. Keipawh tunkar chanchinbu chhuak turah Article ziak turin thawhpuiten min ngen ve takah chuan englam nge ka ziah ang tiin ka inngaihtuah a. Miten ziaklo a an awm theihloh zawk laiin Facebook ah takngial pawh eng thu mah la tial ngai lo leh ngaihzawngte takngial pawh love letter vawikhat mah la thawn ngailo tan hi chuan Lalpa avanga ka unaute ‘Love Letter Pathian thu-ah thawn tur kan ziak tur chu phurrit ava ni tak em! Amaherawhchu Isua Krista avang zawka kan la dai ngailoh lam dai a, hma kan la thar ve tur chu lawmna tamtak ka neih phah leh lawi si!
I Lalte 8:30 thu kan en chuan hman atangin kan thlahtute hnenah a awm theihna turin hmun thianghlimte Lalpan Biakbuk sa turin a ti thin a. Biakbuk a kalte tawngtaina ngaihthlakte a intiam bawk a. Amaherawhchu Lalpa hnena lokal te chuan chaponate nei lova a inngaihtlawm a phut thin a. Jakoba 4:3 ah chuan indil a indil dik silova tih kan hmu a, kan tawngtaina rah kan hmuhtheihlohna chhante hi kan inennawn fo angai a ni mai lo maw? chhan tlakin kan tawngtai lo a ni mai lo maw? Nitin eng nge kan dil thin tihte i ingaihtuah thar fovang u. Inngaitlawma kan dil dik phawt chuan chhanna kan hmu ngei ngei ang. Inngaihtlawmna hian thil tamtak a ti thei a, rawngbawltute phei chu mite aia inngaitlawm tur kan ni. Mi kan inang lova mi tamtak chu piantirh ata tlawm mi ve hrim hrim thuhnuairawh dek, mi inngaitlawm mi hrim hrim a piang an awm ni ve tein ka hre thin. Chung mite tan chuan rawngbawl hi a van nuam dawn em! Thin buluk, thinchhia mahni inthunun theilo mi niin i inhre maithei, Thlarauvin a awmpui che chuan chung i harsatna zawng zawngte chu lak bovin a awm ang.
Thlarauvin mi a awmpui lai chuan mahni tawkah kan chak ve a, mihring nun a tlawm a, tlinglo nia inhriatnate in kan khat leh mai thin. Mite hnena ngaihdam dilte hi a va nuam em! Kohhran chhiatna laite, rawngbawlpuite chhiatna laite hi sawi mai lovin tuma hriat loha siam that kan chak thin. Min sawisel thin tute pawh kan hmangaih let zawk thin. Lungawi dante min zirtir thin a, inkhawmte, chawnghei tawngtaite hi kan thlahlel ngawih ngawih zawk thin. Chutiang thil ropuitak nei tur chuan Lalpa kan biak dan hian awmzia a nei tur a ni. A hmingin rawngbawlpuite duhsakna a zarah Bial a Department pakhatah naupangte niin ka lut ve rawih a. Kha’ng ka hun tawn zawng zawngte kha ka ngaihtuah let changin ka tlinloh thin turziate kha ka inhre thin. Tun hnuah erawh chuan tling lo chungin Pathian awmna ka hre ve tan ta niin ka inhre ta. Pathian hi alo awm hniam em alawm le! Thu chunga dan ang maia ka tawngtainate kha a thlawn chuan ka ringlo, mahse zak chung chung a thingthi a ka tawngtai atang kha chuan Pathian ka hmu ve ta niin ka inhria Lalpa chu fakin awm rawh se!
Bawkkhupa tawngtaite, thingthi a tawngtai laite hian Lalpan minlo awmpui thin anih chu mawle. Lalpa hi alo awm hniam em anih hi mawle. Chuvangin unau duhtak Thlarauvin a awmpui che chuan i rilru natna zawng zawngte kha lak kianin a awm anga, i phurrit zawng zawngte kha Lalpan a phurhsak tawh zawk ang che. Kohhran mipui zawng zawngte thuhnuairawlh leh inngaitlawm takin Lalpa rawng i bawl zel ang u. Pope John Paul II na kha Catholic mipuiten an ngaina em em thin a. Hmun hrang hranga mas a buatsaihahte mi an tam thei hle a. Pope huhang ngah leh mi zah pawla sawi a ni ziah thin, alo thih takah chuan Benedict XI in alo thlak ta a, a kum upat avangte leh chhan dang dang avangte pawh a ni ang, Kohhran mipuiin an hlut vak lova. Pope hlutna pawh a tlahniam nasa hlein an sawi thin a. Alo chawlh ve takah chuan Catholic rangbawltu ropui miretheite ngaihsak em emtu mi inngaitlawm Vatican a Cardinal ho inhmuhkhawm tumte pawh a a inngaihtlawm em avanga tlar hnung lama thu thin Francis Paula chu Pope atan thlanchhuah alo ni ta. Catholic mipuite hian a nungchang leh rawngbawlnate avangin an va ngaisang tehlul em. Tlawmna nun neitu chuan engkim a ti thei a ni. Ava ropui em! A tawpna atan he thu hi kan sawi leh lawk teh ang, tunlaiin zoramah Thlarauvin hna a thawk nasa em em a. Thuthlung faten chi ai phah nan i hmang lovang u. Numbers 22-na thu kan chhiar chuan Israela thlahte ramtiam lam pana an kallai khan Lalpan ropuitakin hnehna a chantir thin a. Moab ho awmna an va thlen dawnin Moab lal Balaka chu alo zam hle mai a. Israel thlahte chu anchhia lawh turin Balaama a ruai ta a. Lalpan hnambik a enkawl lai khan Israel thlahte pawh ni ve lo Balaama kha Lalpan a awmpui ve thin a. Thiltihtheihna ropuitak takte a pe a. Israel thlahte anchhia lawh ngamna nun neitu chuan damlo tihdamnate, thilmak ropui tak tak tihte chu a kalpah vel mai mai ang tih a rin theih a ni. Amaherawhchu Israel thlahte anchhia lawh a tum avang chuan Lalpan alo hnawl ta a, indonaah chuan a boral thu kan hmu ve ta a ni. Thlarau eng ang pawh miin chang se, thiltihtheihna ropui tak tak pawh nei se thuthlung fate a do ni chuan Lalpan ala hnawl ve ang. Lalpan malsawm rawh se!
No comments:
Post a Comment