LALPA I EN ZAWK ANG U - by Jacky Lalruatmawia (Editor)

“Tho la,i awngphah la la, i inah kal rawh, ka ti a che,” a ti a.
- Marka 2:11

Lalpa Thu chu a nung a thil a ti thei a ni tih Pathian Lehkhabuah kan hmu a. Chutiang zelin miin Lalpa a rin tlat chuan a rinna chu a dampui thin a ni tih kan hmu bawk a. Lal Isua khawvela a len lai khan piangsual, mitdel leh kebaite a ti dam thin a. Hmeichhe thiput reh theilo pawh a tidam a ni tih kan hre bawk a. Lalpa’n khang a tihdam ho reng rengte kha a thlawnin Lapa hnen atangin damna an chang satliah mai a ni lova. An thawhchhuah liau liau a ni tlat thung !

Kohhranah hian engatinge ka inhman? Eng nge ka inkhawm chhan? kan hria em le. Kan damchhung hun reilote a, khawlumtak kara a Biak In a kan Inkhawm hram hram thinna chhan chu engdang vang nilovin tawpna ni lo thleng turah thiamloh chan bik kan hlauh vang mai a ni a. Kan tisa chu ala thi ang a, kan thlarau erawh a thi thei tawh dawn silova! Chutihlaiin, Kohhran rawngbawlna a lungawiloh avang ngawtin Kohhran hlat tur kan ni lova. Kohhran rawng kan bawl chhan hi kan bul a mite leh kan thiante avang nilo se ka duh khawp mai. Lalpa i en zawk ilangin, engkim hi Lalpa avang ni thei se, kan rawngbawlna a chak anga. Kohhran pawh kan hlim ngei ang. Kan hnatlang dawnin kan thiante en lovin Lal Isua i en zawk ila, kan inkhawm dawnin midang inkhawm lote en lovin Lal Isua en chungin i inkhawm thin ila. Tin, Kohhran a theihtawp chhuah a kan lo inhman ve tawh nalaiah sawiseltu leh diriamtu kan nei anih pawhin Lal Isua i en tlat ila’ngin. Lalpa en reng chungin engkim ti ila, chutah tak chuan intumchawp Pathian chuan kan mamawhte min pe ang a. A van Thlarau Thianghlim malsawmna in min vur ngei ang tih ka ring tlat a ni.
    

Hmangaihna ka neih siloh chuan thu te sawiin hril vel thin mah ila, dar ben thek ri ang mai mai a ral mai tur a ni a. Hmangaihna kan hlen chhuah erawh chuan, dan kan zawh famkim tihna a ni. Tumahin hmangaihna tel lovin Lalpa ram an lut thei dawn reng reng lova. Hmangaihna nena rawngbawl hna thawk turin Lalpan min ko a ni tih hi hre thar leh ila a tha awm e.
    

Zeng, khum bet a mu reng chuan damna a beisei avangin amah zawntute chuan Lal Isua hnen lam an panpui a. Chutah chuan mipui an lo tam em avangin an haw in an beidawng mai lova, Lal Isua hmuh ngei a duh tlat avangin inchung rek kuain chutah chuan an khai thla ta a ni tih kan hria. Lal Isua hmu tur hian ava bei nasa em ! Lalpa hmu tur hian engtianga nasa in nge kan beih ve tawh le? Chutah, Lalpa Isua chuan “Tho la, i awngphah la la, i inah haw rawh” alo ti a. Kum tam tak khum bet a mu tar thak tawh kha engtin nge thawklehkhatah a thawh tehlul ang? Mahse Lalpa’n tho turin a ti miau si. Kha zeng khan ‘Aa Lalpa, ka thawh theihloh avangin a ni i hnen kan rawn pan, ka tho theilo a ni’ ti ta se. Lalpaah khan damna a hmu angem? Keichuan ka ring lo. Lal Isua chauh kha a en a. Engdangmah a en tawlo reng reng a ni. A ke zengte kha en se, a kal theihloh turziate kha han inngaihtuah hmasa phawt se. A kal ngam ka ring hauh lo. Amaherawhchu chutiang lam chu en lovin Lalpa a en tlat avang khan a dam a, a kal ta a ni.
    

Tun hunah pawh hian Thlarau lam malsawmnate dawng tur chuan Lalpa kan en angai a. Lalpa aw kan nghak anih chuan kan tlai zo tawh ang tih a hlauhawm hlein ka hria! Lalpa chuan kan thuthmun ata hi tho chhuak turin min duh a. Amah en reng chunga kan thochhuak anih chuan a ni chuan min tanpui dawn a ni. Chuti ni lova, kan chaklohna laite inhre reng a, Lalpa laka kan inkiltawih tlat a. Min hawtute leh kan mi ngei zawngte kan en reng anih chuanin Lalpa malsawmna kan dawng pha dawn reng reng lova. Amah ringtute beidawngin a siam ngai lova, beidawnga siam a hnekin tihtakzeta diltute chu a pe mai thin a ni. Chutiang zelin keini pawhin Kohhranah hlimna, Thlarau lam revival chen kan duh anih chuan keimahni kan thawh hmasak angai a. Thlarau lam damna leh malsawmna chu tisa a kan thawhchhuah angai tlat a ni.
    

Jakoba khan Lalpa malsawm ram rim nam anih theihna tur khan a nu Rebeki a thawhpui angai a. Rebekin hmangaih takin a fapa Jakoba tan khan a thawk a ni. Chutiang chiah chuan Kohhran hote hi Lalpa malsawm ram rim ang kan nih theihna tur chuan kan zavaia thawhhona angai a. In elrelnate, insitnate leh inrel te awm lova, Rebeki leh Jakoba anga lungrual tak leh inhmangaih tlang taka kan awm angai a ni. Tin kan chaklohna lai tak chu kan thian thate leh kan rawngbawlpuite annih thin avangin kan rawngbawlpuite en chungin Lalpa rawng hi bawl lo ila. A rawng kan bawlsak Lalpa Isua ngei chu i en zawk ang u. Chutah chuan lungawina kim, hlimna leh lawmna tawp in tai neilo chu a awm si a.
 

Lalpan Malsawm rawh se ! Amen.