UNITED PENTECOSTAL CHURCH INTERNATIONAL-tobul hi Kohhran chhungtin ten kan hriat a pawimawh khawp mai. Mahni awmna Kohhran lo din chhoh dan pawh kan hriat loh chuan kan thinlungah leh kan rinnaah pawh kan nghet thei dawnlo a ni, a chhan chu Kohhran chu Krista taksa a ni si a.
Kum AD 30-ah (PENTICOST NI) Jerusalem khuaa a zirtir 120-ten tawngtai leh Pathian chibai buka an awmkhawm laiin thawklehkhatah van ata ri thlipui tleh angin alo thleng ta a. Tin, leite a maha insem darhin mei angin an hnenah alo inlar ta a. Tin, an chungah a chuang theuh a, an zain Thlarau Thianghlimin an khat ta vek a. Thlarauvin a tawngtir ang zelin tawng dangin anlo tawng ta a (T.T. 1:9) tih kan hmu a. Hemi ni (Pentecost ni) ngei hian Apostol Kohhran chu alo ding ta a ni (T.T 2:1-47). Khhran member 120 chu mi 3000 laiin belhchhahin, an vaiin member pawh 3120 an ni. Heng memberte hi Juda mi vek an ni a, Judate hi pawl thum (3) in an awm. Jerusalem kohhranah khan an tel kim vek a ni.
Lal Isua'n, "simna thu leh sual ngaihdamna thu Jerusalem khua atanga tanin hnamtin hnenah an hril ang,' (Luka 24:27) ti-a a sawi angin Apostolte chuan an hril tan ta a. Paula pawhin Pathian kohna danglam tak hmuin Apostolte rawngbawlna chu a zawm ve bawk a ni. Chu rawngbawlna chu lo darh zelin kohhran pawh alo ding zel a. Chutichuan Apostolte chu Juda sakhaw hruaitute leh Rom lal Nero, Domitiana leh Trajana ten nasa takin an sawisa a, Martar in tamtak an thi a ni. AD 30-100 inkar hi Apostol kohhrante tihduhdahna nasa tak tuara an vahvaihpui hun chu a ni. Apostolte zinga dam rei ber Johana'n AD 96-ah Patmos thliarkara a tan laiin Thupuan chhuah bu a ziak a, AD 100-ah a boral a, Apostolte chu leilungah an muhil zo ta a ni. Hemi hnu AD 100 - 313 velah hian Apostolte rawngbawlna chhunzawmtu anlo awm a, chungte pawh chu Rom sorkar tihduhdahnain khandaiha sah hlumte , thingzainaa zai bunte, tel so-a thlakte leh sakawlhte pawhsawm tirin hrehawm tamtak tuar zovin Lalpa hnenah an rawngbawlna chu an chawlhsan ta a ni.
AD 313 ah Constantine-a Rom lal (Emperor) alo nih atangin kohhran tihduhdahna chu tihtawp alo ni ta a, amah ngei pawh kristian niin Kohhran chu alo zalen ta hle a. Kristian ten zalenna an neih tak atangin, an zalenna chu hmang thiam lovin Apostolte rindan leh tihdante chu zir lovin mahni mihring ngaihdan apiang tha ber leh dik ber a ngaihna lo lianin an inzirtir nasa hle a ni. Rom sorkar tlukchhiat hnuah Roman Catholic chuan khawvel pumpuiah thuneih tumin nasa takin hma a la a, Pope leh Cardinalte Bishopte chauhin Bible an chhiar thin a, he inkaihhruaina leh inzirtirna hi mi thenkhatin duhlova dodal an awm nasa em em a. Pope in a sual ngaihdam theihna aneihte chu diklo tia dodal tamtak an lo chhuak ta a. Chuta tang chuan Kristian ro rovah pawh rindan in ang lo tak tak, Apostolte inzirtir dan ang lova rinna chi hrang hrang alo chhuak ta a. AD 313-1900 AD inkar hian kohhran siam that hna chu nasa taka thawh a ni a, amaherawhchu Apostolte zirtirna leh thurin chhui nachang hre lovin Baptisma chan danahte , Lalpa zanriah sacrament kil danahte, Pathian pakhat anih dante, Thlarau Thianghlim baptismate diklo taka zirtirnain alo darh ve zel ta a. AD 313-AD 1900 inkar hi thlarau lamah chuan 'hun reh' tih alo ni bawk a ni.
Rev. Charles Fox Parham kum 25 leka upa chuan kum 1890 khan Topeka, Kansas bialah 'Bethel Pathian tihdamna in' (Bethel Devine Healing Home) a din a. Kum 1900 tawp lamah chumi hmun vekah chuan Bible zirna School (Bethel Bible College) a din bawk a ni, zirlai sawmli (40) anei bawk a. He Bible zirna school ah hian Bible lo chu zirlaibu dang an nei lova, an zirdan pawh ala sang em em hran lova. Thupui pawimawh tak tak thlang chhuakin Bible-in engtin nge a sawi tih hmuhchhuah tumin an zawng vak mai a ni. Nikhat chu thupuiah Thlarau Thianghlim tih an thlang a, an sawiho naah, "Pentecost ni-a Thlarau Thianghlim lo thleng, Thlarauvin a tihdanglam dan leh, a tawngtir dan ang zela tawng danga an tawng chhuah a, taksa chetna an dawn ngei a, uaiin thar rui ang maia an awm kha" tiin an zir ta chiam mai a. A tiam kha nangni tan pawh, in fate tan pawh, hla taka mi zawng zawng tan, Lalpa kan Pathianin a koh apiangte tan a ni e (T.T 2:39) tih ziak ang khan dawn ve ngei tumin chawnghei tawngtai an bei ta ngat ngat mai a. Ni 1/1/1901 zing lam dar 1:00 ah chuan Pentecost ni ami ang khan thlarau thianghlim alo thleng ta a, an sikul chu thlarau thianghlim thiltihtheihna chuan a khat ta vek a, tawng hriat lohin an tawng chhuak ve ta a ni.
Pentecost-ni ami anga thlarauva Harhna alo thlen leh atang chuan Thlarau Thianghlim hnathawh chu kal zelin, Rev. Charles F. Parham-a leh a zirlai ten a harhtharna an dawn atang chuan an lu chunga kut nghata intawngtaisak tawnin thlarau an lo dawng ta zel a. Rev. Charles F. Parham-a hian 3 Jan, 1901 ah Free Methodist Biak Ina thu a sawi hlanin zirlai thenkhatin tawngtaina an neih laiin Thlarau Thianghlim chu alo thleng ta a ni. Rev. F. Parhama inkhawm bangin Bible School a rawn thlen lai chuan pindan zawng zawng chu eng tle surin a hmu a. Hemi ni hian ani pawh hian Thlarau Thianghlim chu a dawng ve ta a ni. Kum 1902 ah Rev. Charles F. Parham-a chuan Isua hmingin Baptisma a chang ta a, a lehkhabu ziak "Thlaler Au Aw" tihah chuan; "Pa leh fapa leh Thlarau Thianghlim hian tumah an thi ngai lova, an tho leh ngai bawk hek lovang. Pa leh fapa leh thlarau thianghlim hminga baptisma chan chu thil theih a ni lo. Isua Krista Pathianna hi i ring anih chuan a thihnate, phuma a awmna leh a thawhlehnate tawmpuiin nangmah ngeiin hnimphumin baptisma i chang tur a ni. Pa leh Fapa leh Thlarau Thianghlim chu Isua anih avangin, hming pakhat Isua chu in tawmin, mi zawng zawng nen inremin pumkhat inlo ni tawh ang" tiin. He harhna lo thleng hian Apostolte thurin chu mite thinlungah a rawn tung ding leh ta a ni.
Kum 1906-ah Thlarau Thianghlim dawngtuten Azuza kawtthler No. 312-ah in hlui pakhatah inkhawmna an buatsaih a, hetah hian an thuhriltu chu Rev. Seymora a ni a, sermon ropui tak tak Pathianin a sawi tir a, mi tamtak ako khawm zel a, Thlarau Thianghlim an dawng zel a, damlo leh natna tuarten damna ropui tak an chang a, chu chuan mipui ko khawm zelin. Pentecost thudik an hmuh leh an hriat chu puang darh lovin an awm thei lova. Thuthlung dik chu an puang darh ta zel a ni. He hmunah hian kum thum chhung chawl lovin harhna changtuten hun an hmang a ni.
He harhna hian India hmarchhak pawh lo thleng ve zelin kum 1904-ah Wales ram a thleng ve ta a, hetih lai hian Khasi rama missionary Rev. John Roberts pawh Wales rama a haw lai a ni a. Ani pawh hi nasa takin a nuai ve a ni. Kum 1905 ah Khasi rama alo haw leh chuan North East India-ah harhna chu a rawn pu lut ta a ni.
March 15-18, 1906-a Mairang khuaa khawmpui hmang turin Mizoram atangin mi 10 Khasi ramah an kal a. Chung mite chu Aizawl lam atangin mi pasarih; (1) Chawnga (2) Khuma (3) Thanga (4) Pawngi (5) Vanchhunga
(6) Thangkungi (7) Siniboni (Khasi nu). Lunglei lam atangin mi 3; (1) Thangkunga (2) Parima (3) Zathanga te an ni. Mairang a khawmpui a tiak hnu chuan Mizoramah lo haw chho lehin April 4, 1906-ah Aizawl ah an lut a, Chaltlang (tuna Bethel lungphun awmna)-ah hian tawngtaihona an neih laiin an hnenah harhna chuan hna a rawn thawk leh a. Mizoramah kum 1894-1906 inkar, kum 12 zet Missionary ten hna an thawh chhung khan Kristianah mi 404 chauh an siam a. Harhnain April 4, 1906-a Mizoram a rawn tuam ve atangin Kristianna chuan Mizoram chu a rawn hneh ta a, 'Kristian Ram' tih alo ni ta hial a ni. He harhna hi a kal zel a, India hmarchhakah Pentecost thuthlung tung ding turin bul a rawn tan ve ta a ni.
(6) Thangkungi (7) Siniboni (Khasi nu). Lunglei lam atangin mi 3; (1) Thangkunga (2) Parima (3) Zathanga te an ni. Mairang a khawmpui a tiak hnu chuan Mizoramah lo haw chho lehin April 4, 1906-ah Aizawl ah an lut a, Chaltlang (tuna Bethel lungphun awmna)-ah hian tawngtaihona an neih laiin an hnenah harhna chuan hna a rawn thawk leh a. Mizoramah kum 1894-1906 inkar, kum 12 zet Missionary ten hna an thawh chhung khan Kristianah mi 404 chauh an siam a. Harhnain April 4, 1906-a Mizoram a rawn tuam ve atangin Kristianna chuan Mizoram chu a rawn hneh ta a, 'Kristian Ram' tih alo ni ta hial a ni. He harhna hi a kal zel a, India hmarchhakah Pentecost thuthlung tung ding turin bul a rawn tan ve ta a ni.
Kum AD 1901-a khawvela harhna alo thlen leh atangin Pentecost Kohhran chi hrang hrang anlo piang leh ta zel a, Kohhran hrang hrang 12 lai lo dingin Thlarau Thianghlim hnathawh leh a pawimawhnate; Pathian pakhat thurin pawm leh Isua hminga baptisma chang kohhran an ni a. Chung Pentecost Kohhrante chu hmun infin khawm zelin Pentecostal Church Incorporated (Octt., 1932, Arkansas State) leh Pentecostal Assemblies of Jesus Christ (1931) alo piang ta a. He pawl lian tak pahnihte hian Kohhran pakhata insuihkhawm zai an rel a. Inzawmkhawm hmaa thurin leh innghahna (Fundamental Doctrine) siam chu an vei hmasak ber a ni. Jan.,30, 1945 ah St. Louis khawpui ah Committee an nei ta a, Pentecostal Assemblies of Jesus Christ atangin; (1) Rev. WT Witherspoon (2) Rev. SR Hanby (3) Rev. Oliver F. Fouse. Pentecostal Church Incorporated atangin; (1) Rev. Howard A. Goss (2) Rev. Oscar (3) Rev. BH Hite, hengte hi committee kalte an ni. Ngun taka an sawiho laiin Rev. Witherspoon-a thinlungah Lalpa'n thu a rawn thlen ta a. Room ah pawh awm thei lovin 'Pentecostal Publishing House' ah a tlan lut a. Lehkha chhutna khawlin tuna kan Fundamental Doctrine hi alo ziak chhuak a. General Boardte chuan lungrual takin an pawm tlang nghal a ni.
March 20, 1945 ah '3449 South Grand Boulevard' hmunah Committee an nei leh a, hemi tum hian an Dan bu ve ve chu hmun khatah suih finnin Dan leh inenkawlna chu Committee leh a tih ngheh atan an duang fel vek bawk a ni.
April 17-20, 1945 ah St. Louis, Missouri ah General Boardte chuan Committee hona an nei a. Kohhran hming tur chu an ngaihtuah pawimawh ber a ni. Rawtna hrang hrang lo lutin an sawi ho fe hnu chuan Rev. B. Hite chu Thlarau pawlna nasa tak nen "United...United...United" tiin tap chungin a rawn au chhuak ta a. General Board memberte chu a hneh hle a ni. Pawl hming atan chuan United Pentecostal Church ni rawh se, tih chu hnialtu awm miahlovin nemngheh nghal a ni ta a ni.
Sept.21-26, 1945 chuan St. Louis khawpuiah pawl pahnihte hian Gen. Conference an nghat rual a. Inpumkhat duhna thinlung an pu tlang hlawm hle mai a. Awm hran duhna reng reng an nei ta lo. General Board neiin inenkawlna Dan bulpui siam nghal a ni. United Pentecostal Church chu nemnghetin khawvel ram zawng zawnga darh zel tur leh Lal Isua lokal leh hmaloh chu chanchintha famkim puangdarh zel turin a rawn intan ta a ni. Hruaitu hmasate:
*Gen. Superintendent - Rev. Howard A Goss
*Asst. Gen. Suptd. - Rev. WT Witherspoon
* Gen Secy. Treasurer - Rev. Stanley
* Foreign Mssions Secy. - Rev. Wynn T.S
* Editor, Pentecostal Herald - Rev. MJ Wolff
* Asst. Editor " - Rev. Paul H. Box te an ni.
*Asst. Gen. Suptd. - Rev. WT Witherspoon
* Gen Secy. Treasurer - Rev. Stanley
* Foreign Mssions Secy. - Rev. Wynn T.S
* Editor, Pentecostal Herald - Rev. MJ Wolff
* Asst. Editor " - Rev. Paul H. Box te an ni.
April 17-20, 1945 General Board in alo rel tawh angin St. Louis, Missouri a Pentecostal Church Incorporated office chu UPC Office atan an nemnghet ta a ni. Kohhran lo din atanga kum 65 a pelh meuh chuan khawvel ram bung hrang 201-ah Kohhran tha tak tak alo ding chho zel a, member pawh 4,036,945 (Maktaduai li chuang) anlo awm ta a ni. United Pentecostal Church chu ramtinah alo darh ta a ni. Kohhran dikah ngei hian rinna nghet tak neiin, rinawm takin Lalpa rawng i bawl zel ang u. Lalpa'n malsawm rawh se
No comments:
Post a Comment