KRISTA TAWNGTAINATE (Kumpuan Huang Article)

 Krista tawngtai thinnate hian Isua leh Pa chu mihrang angin a tilang thei em? Mihrang angin a tilang thei chuang lo, Amaherawhchu, Pathian leh Pathian Fapa chu a hrang angin a lantir a ni. Pathian a nihna ang chuan Isua chu a tawngtai lova, mihring a nihna ang chauhin Isua chu a tawngtai thin a ni. Isua tawngtaina hian Isua Pathianna nihphung chu Pa lakah mihrang anga a lantir anih chuan Pa Pathian aiin a hnuaihnung zawk a ni ngei ang. Pathian anihnain Isua hi tawngtai ni ta ang se , Pathiana a dinhmun chu, Pathiana midang awm vete aiin a hnuaihnung zawk tihna a ni bawk ang. Hei hian Trinity thurin a, mi pathum intluktlang vek anga an sawi thin chu a \hiat sak vek a ni. Tawngtai mamawh Pathian chu Pathian a ni thei dawn em ni? Pathian chuan Engkimtithei anihna ah chuan tawngtai a mamawh lova, pakhat chauh a nih bawk si chuan Pathian tu dang hnenah nge a tawngtai ang? Isua tawngtainate hian Pathianah mi pahnih an awm tih a lantir si chuan, pakhat zawk tawngtaitu zawk chu  a tawngtaina lo ngaithlatu Pathian aiin a hnuaihnung zawk a, Pathian a ni kim tak tak lo tihna a ni ang.
     

Krista tawngtaina chhan chu engtia hrilhfiah tur nge ni ta ang le? Mihring mihrinna, Isuaa awm chauh chu, chatuana awm Thlarau Pathian hnena tawngtai thei chu a ni. Pathiana Isua awm chuan tanpuina a mamawh lova, mihrinna zawk chuan tanpuina a mamawh a ni. “Thlarau chuan a peih a, tisa erawh chu a chak lo a ni” tiin Gethsemani huanah Lal Isua pawhin a sawi kha (Matthaia 26:41). Isua khan “Tisaa a lenlainite ah chauh khan” tawngtai a mamawh a ni tih Hebrai 5:7 thu chuan min hrilh a ni. “Ani chuan, a tisa put lai niahte khan, thihna laka amah chhandam theitu hnenah chuan nasa taka au leh  mittui tla chungin a tawngtainate leh dilnate a hlan a, a tih dek thin avangin ngaihthlakin a awm bawk a; Fapa meuh pawh nimahsela a thil tuarahte chuan thu awih a zir ta a ni”. Gethsemani huana a tawngtainaah khan mihring duhzawng chu a Pathian duhzawnga awm turin a hlan a ni. A mihring mihrinna mizia zawng zawng chu a tawngtainaah chuan Pathian Thlarau hnenah a inhlan a, thuawih a zir a ni (Philippi 2:8; Hebrai 5:7-8). He thil hi Pathian pahnih duhzawng, Isuaa awm vete chu a inbuan tihna a ni. A mihring mihrinna chu Pathian Thlarau hnenah chuan a inhlan a, Pathian Thlarau hnen atang chuan chakna a dawng bawk thin a ni.
    

Hetiang zawnga hrilhfiah hi mi thenkhat chuan a dik a ni thei lovang a, a chhan chu, Ama hnenah Isua chu a tawngtai a ni tihna ang a nih avangin. Chutah tak chuan hei hi kan hrechhuak leh tur a ni ang: Isua chuan, mihring dang anglo takin, Pathian famkim nihna leh mihring famkim nihna a nei kawp bik a ni tih hi. Mihring pangngai tana thil theih miah loh hi Lal Isua tan thil har engmah a awm si lova. Lal Isua chu ama hnenah a tawngtai thin kan ti lova, chu chuan mihring pangngai ang bawkin mihring nihphung chauh nei angin Isua a lantir theih avangin a dik tawk lova. Isua mihring mihrinna chu Amaha awm Isua Thlarau hnenah chuan a tawngtai thin kan ti zawk a ni.
               
    Engti sawi nge dik zawk tih chu awlsam takin a chhan theih mai a. Isua chu Pathian a nihna angin Pa hnenah a tawngtai kan ti dawn nge, Isua chu mihring a nih avangin Pa hnenah a tawngtai kan ti zawk dawn? A hmasa zawk khi a dik zawk kan tih dawn chuan , Pathian hnuaihnung deuh zawk a awm rinna (subordinationism) kan pawm tihna a ni anga, chu chu Arianism pawmtute rindan a ni a, chutah chuan Pathian mihrangte zinga pakhat (Isua) chu a hnuaihnung zawk a, Pathian dangte nen an intluktlang lo tih rinna a awm a ni. A hnuhnung zawk khi dik zawkah kan pawm erawh chuan Pathianah minung hrang a awm lo tih kan ring tihna a ni. Pathianna leh mihrinna chauh chu danglamna awm chu a ni a, Pathian leh Pathian inkar thu sawina nilovin. **
(Thlalak : Lal Isua Gethsemani Huanah a tawngtai lai hlimthla)