30th AUGUST, 2015 : VOL.I, ISSUE NO. 15 ; BAIRABI NORTH PYD ; PATHIANNI,

 VAWIINAH BETHEL DAWN

Vawiin Dt. 30th August, 2015 hian Local PYD bul tumin Biak Inah Bethel (Tawngtaina) hun hman a ni dawn a. Local PYD member zawng zawngte mai bakah Kohhran mipui, Lalpa beiseitute zawng zawng chu he huna tel theuh tur hian Local PYD chuan a sawm a ni. Dar 5:30 pm ah tan a ni ang a. Kaihruaitu atan Bro. Jacky Lalruatmawia a ni ang.

PYD HNATLANG

Dt. 25 (Thawhlehni) khan Local PYD-te chuan Meidum leh Pangbalkawn inkar kawng sam fai hnatlang an nei a. He hnatlangah hian member 22 thawkchhuak a ni. Hnatlang ei tur Ar pum khat chu Bro. B. Lalrinkima’n a tum a. Tin, inhlawhna min hmuhsaktu Bro. Lalmuanpuia Hnamte chungah Local PYD chuan lawmthu a sawi tak meuh a ni.
Dt. 27 (Ningani Zan) khan Local PYD chuan Committee neiin PWD-a hna an thawh bak thawh leh nise ti a rel a ni. Hnatlan hun atan Dt. 29 (Inrinni) a ruat fel nghal bawk. Hnatlanga thawkchhuak zawng zawngte chungah leh Kohhran nu leh pate chungah hruaitute chuan lawmthu an sawi tak meuh a ni.

BEIHRUAL

Beihrual thla kan thleng leh dawn ta a. September 1, Thawhleh zan atang hian Beihrual Thupui zir hona neih tan a ni ang a. Beihrual Programme erawh karleh lamah lo tihchhuah a ni ang. 

LOCAL CHURCH BOARD COMMITTEE THUCHHUAK

* Local Sunday School Board in Cieling Fan pali (4) alo dil chu, an dil anga remtihsak a ni.
* Kohhran bungrua cieling fan leh tube light hman tawhloh chu tihral tur a ni. Tubelight (pakhat zelah) Rs. 120.
Cieling fan (pakhat zelah) Rs. 300. A lei duhte chuan Church Board Secretary leh Treasurer te biak tur a ni.
* Bro. Jacky Lalruatmawia chu Nilai Zan hun hmang thei tura hlankai a ni. Bro. R. Lalremruata (Maruata) chu hun khatna hmang thei tura hlan kai a ni bawk.

CHANG ZIR NGAWRH

Bial Sunday School Conference alo hnai leh ta a. Naupang Sunday School chuan mahni department ah theuh pakhatna nih tum vekin tunlai hian chang, hla leh thuinchhangte an zir ngawrh hle.

PYD FINANCIAL SECRETARY THAR

Dt. 23/8 (Pathianni) chawhma inkhawm ban hmang khan Local PYD chuan Committee a nei a. Chutah chuan, Financial Secretary ni lai Sis. Rebecca Lalhmunmawiin harsatna a neih tak avangin a aiawh turin Sis. Zoramfeli ruat a ni.

NAU PIANG

Dt. 23/8 (Pathianni) Zing khan kan Joint Editor, Local PYD Vice President ni bawk Bro. Lalrinliana Tlau-te nupa chuan fapa thar an nei. Beer Lahai Roi Editorial Board leh Local PYD te chuan thinlung takin kan lawmpui a ni.

========================